આણંદ શહેરમાં મંજૂરી વગર ધમધમતી ફટાકડાની હાટડીઓ છતાં તંત્રનું મૌન

- ભીડવાળા વિસ્તારોમાં હાટડીઓથી જાહેર સલામતી સામે જોખમ

- ફાયર વિભાગ દ્વારા ફક્ત ૬૪ને એનઓસી અપાઈ  અનેક વેપારીઓએ મસમોટો જથ્થો સંગ્રહ કર્યો

આણંદ : લગભગ અઢી માસ પૂર્વે આણંદ શહેરની એક ફટાકડાની દુકાનમાં લાગેલ ભીષ્ણ આગના ધુમાડા તો હાલ સમી ગયા છે પરંતુ દિવાળી પર્વને લઈ આણંદ શહેરની રહેણાંક વિસ્તારોમાં પુનઃ એકવાર ફટાકડાની હાટડીઓ ધમધમતી થઈ છે. આણંદ ફાયર વિભાગ દ્વારા દારૂખાનાના વેપાર અંગે ૬૪ એનઓસી આપવામાં આવી છે. જો કે કેટલાક વેપારીઓએ લાયસન્સ વિના જ ધંધો શરૂ કર્યો હોવાની સાથે તંત્રના નિયમોની ઐસીતૈસી કરી મોટી માત્રામાં દારૂખાનાના જથ્થાનો સંગ્રહ કરી વેપલો શરૂ કર્યો હોવાનું જાગૃતો જણાવી રહ્યા છે.

દિવાળી પર્વને લઈ આણંદ જિલ્લા વહીવટી તંત્ર દ્વારા હાલ દારૂખાનાના વેપારીઓને વેપાર કરવા માટે હંગામી પરવાનો આપવામાં આવી રહ્યો છે. દિવાળી પર્વ નિમિત્તે ૧૦ દિવસ માટે ફટાકડાનો વેપાર કરવા માટે આણંદ ફાયર વિભાગ દ્વારા ૬૪ વેપારીઓને એનઓસી આપવામાં આવી છે. જો કે તંત્ર દ્વારા દુકાનોમાં માત્ર ૪૦૦ કિલોનો જ જથ્થો સંગ્રહ કરવાની પરવાનગી હોવા છતાં કેટલાક વેપારીઓ દ્વારા મોટી માત્રામાં દુકાનોમાં દારૂખાનાનો જથ્થો સંગ્રહ કરાયો હોવાનું ચર્ચાઈ રહ્યું છે. સાથે સાથે રહેણાંક તેમજ ભીડભાડવાળા વિસ્તારમાં દારૂખાનાની દુકાનને લઈ સ્થાનિકોના જીવ સામે જોખમ હોવા છતાં કેટલાક વેપારીઓ દ્વારા રહેણાંક વિસ્તાર તેમજ ભીડભાડવાળા વિસ્તારમાં દારૂખાનાની હાટડીઓ શરૂ કરી દેવામાં આવી છે. પુરતી ફાયર સુવિધા સાથે વેપાર કરવા માટે પરવાનગી આપવામાં આવતી હોવા છતાં કેટલાંક વેપારીઓ ફાયર સુવિધાના નિયમો નેવે મુકી ગ્રાહકોના જીવ જોખમમાં મુકતા હોવાનો રોષ જાગૃતોએ ઠાલવ્યો છે.

આણંદ શહેરના જુના બસ મથક, સ્ટેશન રોડ, ગંજ બજાર, વિદ્યાનગર રોડ, જુના રસ્તા, સી.પી. કોલેજ વિસ્તાર સહિતના વિવિધ સ્થળોએ દારૂખાનાની હાટડીઓ મંડાઈ ચુકી છે. જે પૈકી કેટલીક હાટડીઓ ખાતે ફાયર સુવિધાનો અભાવ હોવાનું જોવા મળી રહ્યું છે. સાથે સાથે રહેણાંક  વિસ્તારમાં દારૂખાનાનો વેપલો શરૂ થતાં સ્થાનિકોમાં તંત્રની નીતિ સામે અનેક સવાલો ઉઠયા છે. સંબંધિત તંત્ર દ્વારા આ મામલે યોગ્ય તપાસ કરી કાયદાનું ઉલ્લંઘન કરતા વેપારીઓને પાઠ ભણાવવામાં આવશે કે પછી પત્રમ્ પુષ્પમ્ના વ્યવહારથી તેરી ભી ચુપ મેરી ભી ચુપની નીતિ અપનાવાશે તે તો સમય જ બતાવશે.

https://ift.tt/3EmQyym