મતદાન પહેલા જ ગુજરાતમાં ભાજપનો ડંકો: નવસારી, ખેડા, કચ્છ, તાપી અને પાટણમાં અનેક બેઠકો પર બિનહરીફ જીત!

<p><strong>BJP Unopposed Win Gujarat: </strong>સ્થાનિક સ્વરાજ્યની ચૂંટણી માટે હજુ મતદાનની પ્રક્રિયા બાકી છે, પરંતુ ગુજરાતમાં ભારતીય જનતા પાર્ટી (BJP) એ અત્યારથી જ પોતાની જીતના શ્રીગણેશ કરી દીધા છે. રાજ્યના નવસારી, ખેડા, કચ્છ, તાપી અને પાટણ એમ અલગ-અલગ વિસ્તારોમાં મતદાન પહેલા જ ભાજપના અનેક ઉમેદવારો બિનહરીફ વિજેતા જાહેર થયા છે. સામે અન્ય કોઈ પક્ષ કે અપક્ષ ઉમેદવારે ફોર્મ ન ભરતા આ તમામ બેઠકો પર ભાજપના ઉમેદવારોને સીધી જ લોટરી લાગી ગઈ છે. ચૂંટણી પહેલા જ આ પરિણામો આવી જતા કાર્યકરો અને ઉમેદવારોમાં અગાઉથી જ જશ્નનો માહોલ છવાઈ ગયો છે.</p> <p><strong>નવસારીમાં ભાજપને મળી સૌથી મોટી બિનહરીફ જીત</strong></p> <p>દક્ષિણ ગુજરાતના નવસારી જિલ્લામાં ભાજપે કમાલ જ કરી દીધી છે. અહીં મતદાન પહેલા જ પાર્ટીએ કુલ 9 બેઠકો પોતાના નામે કરી લીધી છે, જેમાં જિલ્લા પંચાયતની 3 અને ગણદેવી તાલુકા પંચાયતની 6 બેઠકોનો સમાવેશ થાય છે. જિલ્લા પંચાયતની વાત કરીએ તો, બિગરી બેઠક પરથી ભીખુ પટેલ, ઘેજ બેઠક પરથી અમિતાબેન અને દેવસર બેઠક પરથી રેખા પટેલ બિનહરીફ ચૂંટાઈ આવ્યા છે. આ ઉપરાંત, ગણદેવી તાલુકા પંચાયતની બીગરી-1, બીગરી-2, દેવસર-2, માસા, ભાઠા અને અજરાઈ એમ કુલ 6 બેઠકો પર પણ ભાજપના ઉમેદવારો કોઈ પણ હરીફાઈ વગર સીધા જ જીતી ગયા છે.</p> <p><strong>તાપીના વ્યારામાં આખી પેનલનો સફાયો!</strong></p> <p>તાપી જિલ્લાના વ્યારામાં પણ વોર્ડ નંબર 5 માં ભાજપનો જબરદસ્ત દબદબો જોવા મળ્યો છે. અહીં ભાજપની આખી પેનલ જ બિનહરીફ જાહેર થઈ છે. કોઈ વિરોધ ન હોવાથી ભાજપના ઉમેદવારો દિલીપ જાધવ, દ્રષ્ટિ અનમોલા, અનિલ સીરસાથ અને નિમિષા ચૌધરીનો સીધો વિજય થયો છે.</p> <p><strong>ખેડા અને પાટણમાં પણ ખુલ્યું ખાતું, ઉજવણી શરૂ</strong></p> <p>મધ્ય ગુજરાત અને ઉત્તર ગુજરાતમાં પણ ભાજપે મતદાન વગર જ પોતાનો વિજય વાવટો લહેરાવી દીધો છે.</p> <p>ખેડા તાલુકા પંચાયતની પરસાતજ બેઠક પર ભાજપના ઉમેદવાર રાયસંગભાઈ ગોહિલ સામે કોઈએ ફોર્મ ન ભરતા તેઓ બિનહરીફ વિજેતા બન્યા છે અને સમર્થકો સાથે ભવ્ય ઉજવણી પણ શરૂ કરી દીધી છે.</p> <p>બીજી તરફ, પાટણ તાલુકા પંચાયતની ટુવડ સીટ પર પણ ભાજપ સિવાય એકપણ ઉમેદવારે ફોર્મ ન ભરતા ગાયત્રીબેનનો બિનહરીફ વિજય થયો છે.</p> <p><strong>કચ્છના નખત્રાણામાં 2 સીટો પર કબ્જો</strong></p> <p>છેવાડાના જિલ્લા કચ્છમાં પણ કંઈક આવો જ નજારો છે. નખત્રાણા નગરપાલિકામાં ભાજપે મતદાન પહેલા જ 2 સીટો કબ્જે કરી લીધી છે. નગરપાલિકાના વોર્ડ નંબર 4 અને 5 માં અન્ય કોઈ પક્ષમાંથી ઉમેદવારી ન નોંધાતા, ભાજપના ઉમેદવાર મનન લુહાર અને મધુબેન સુથારને બિનહરીફ જાહેર કરવામાં આવ્યા છે. મતદાન પહેલા જ મળેલા આ એકતરફી વિજયથી પક્ષના સ્થાનિક સંગઠનોમાં ભારે ઉત્સાહ જોવા મળી રહ્યો છે.</p>