Gujarat Rain: આ 7 જિલ્લાઓમાં વરસાદ તબાહી મચાવશે, 9 ઇંચ સુધી પડવાની પરેશ ગોસ્વામીની આગાહી

<p><strong>Paresh Goswami weather prediction:</strong> હવામાન નિષ્ણાત પરેશ ગોસ્વામીના મતે, બંગાળની ખાડીમાંથી ઉદ્ભવેલી અને હવે ભાવનગર ઉપર કેન્દ્રિત થયેલી સિસ્ટમની અસરને કારણે ગુજરાતમાં 28 સપ્ટેમ્બરથી શરૂ થયેલો વરસાદ 2 ઓક્ટોબર સુધી ચાલુ રહેશે. આ સિસ્ટમ હવે ધીમી ગતિએ પશ્ચિમ દિશામાં આગળ વધી રહી છે અને દરિયાઈ સપાટી પરથી ઊર્જા મેળવીને વધુ મજબૂત બની છે. છેલ્લા 24 કલાકમાં ગીર સોમનાથના સુત્રાપાડામાં 8 થી 9 ઇંચ સુધીનો વરસાદ નોંધાયો છે. આગામી 24 થી 36 કલાક દરમિયાન સૌરાષ્ટ્રના દરિયાકાંઠાના જિલ્લાઓમાં, જેમાં ભાવનગર, અમરેલી, ગીર સોમનાથ, જૂનાગઢ, પોરબંદર, દ્વારકા અને જામનગરનો સમાવેશ થાય છે, ત્યાં ભારેથી અતિભારે વરસાદ અને 40 થી 50 કિમી/કલાકની ઝડપે પવન ફૂંકાવાની શક્યતા છે. દક્ષિણ ગુજરાત, મધ્ય ગુજરાત અને ઉત્તર ગુજરાતના ભાગોમાં પણ મધ્યમથી ભારે વરસાદનું અનુમાન છે.</p> <p><strong>વરસાદી સિસ્ટમનું વર્તમાન લોકેશન અને તીવ્રતા</strong></p> <p>બંગાળની ખાડીમાં ઉદ્ભવેલી વરસાદી સિસ્ટમ આંધ્રપ્રદેશ અને મહારાષ્ટ્ર થઈને દક્ષિણ ગુજરાત પરથી પસાર થઈ છે. હાલમાં, આ સિસ્ટમનો સેન્ટ્રલ પાર્ટ સૌરાષ્ટ્રના ભાવનગર જિલ્લા ઉપર પહોંચી ગયો છે.</p> <ul> <li>સિસ્ટમની સ્થિતિ: આ સિસ્ટમનો ઘેરાવો લગભગ 430 કિમી આસપાસનો છે અને અરબ સાગર પરથી પસાર થતાં તેને ફુલ એનર્જી મળતા તે વધુ મજબૂત બની છે.</li> <li>ગતિ: સિસ્ટમ મજબૂત બનવાને કારણે તેની આગળ વધવાની ગતિ ધીમી પડી ગઈ છે. હવે તે ધીમી ગતિએ દરિયાકાંઠેને કાંઠે દ્વારકા સુધી પહોંચશે અને ત્યાંથી પશ્ચિમ દિશામાં અરબ સાગરમાં આગળ નીકળી જશે.</li> <li>વરસાદની સમયસીમા: આ વરસાદી માહોલ હજુ 2 ઓક્ટોબર સુધી રાજ્યમાં નોંધાશે.</li> </ul> <p><strong>આગામી </strong><strong>2 </strong><strong>દિવસની આગાહી</strong><strong>: </strong><strong>સૌરાષ્ટ્રમાં</strong> <strong>અતિભારે વરસાદ</strong></p> <p>આગામી બે દિવસ દરમિયાન વરસાદની સૌથી વધુ તીવ્રતા સૌરાષ્ટ્રમાં જોવા મળશે, ખાસ કરીને દરિયાકાંઠાના વિસ્તારોમાં:</p> <ul> <li>ભારેથી અતિભારે વરસાદ (29 સપ્ટેમ્બર રાતથી 1 ઓક્ટોબર બપોર સુધી): ભાવનગર, અમરેલી, ગીર સોમનાથ, જૂનાગઢ, પોરબંદર, દ્વારકા અને જામનગર જિલ્લાઓમાં ભારેથી અતિભારે વરસાદની શક્યતા છે. આ દરમિયાન પવનની ઝડપ 40 થી 50 કિમી પ્રતિ કલાક રહેશે અને ગાજવીજ સાથે વરસાદ પડશે.</li> <li>મધ્યમથી હળવો વરસાદ: રાજકોટ, બોટાદ, મોરબી, સુરેન્દ્રનગરના ભાગોમાં 1 થી 1.5 ઇંચ સુધીનો હળવાથી મધ્યમ વરસાદ વરસી શકે છે.</li> <li>નોંધપાત્ર વરસાદ (છેલ્લા 24 કલાકમાં): ગીર સોમનાથના સુત્રાપાડામાં 8 થી 9 ઇંચ અને સૌરાષ્ટ્ર-દક્ષિણ ગુજરાતના અન્ય વિસ્તારોમાં સરેરાશ 2 થી 5 ઇંચ વરસાદ નોંધાયો છે.</li> </ul> <p><strong>ગુજરાતના અન્ય વિસ્તારોમાં</strong> <strong>વરસાદનું અનુમાન</strong></p> <p>દક્ષિણ, મધ્ય અને ઉત્તર ગુજરાતમાં પણ હજી 30 સપ્ટેમ્બરની મોડી રાત સુધી વરસાદ ચાલુ રહેવાની શક્યતા છે:</p> <ul> <li>દક્ષિણ ગુજરાત (2 થી 3 ઇંચ): ભરૂચ, અંકલેશ્વર, સુરત, વલસાડ, વાપી, નવસારી, ડાંગ, બિલીમોરા, તાપી અને રાજપીપળા સહિતના તમામ વિસ્તારમાં આગામી 24 થી 36 કલાક દરમિયાન 2 થી 3 ઇંચ સુધીનો વરસાદ નોંધાશે, જોકે તેની તીવ્રતા અગાઉ કરતા થોડી ઓછી રહેશે.</li> <li>મધ્ય ગુજરાત (1 થી 2 ઇંચ): આણંદ, નડિયાદ, ખેડા, વડોદરા, કપડવંજ, ગાંધીનગર, અમદાવાદ, સાણંદ, વિરમગામમાં 30 સપ્ટેમ્બરની મોડી રાત સુધીમાં 1 થી 2 ઇંચ સુધીના વરસાદનું અનુમાન છે.</li> <li>પૂર્વ મધ્ય ગુજરાત: દાહોદ, ગોધરા, છોટા ઉદયપુર અને મહીસાગરમાં છૂટાછવાયા હળવા મધ્યમ વરસાદ (0.5 થી 1 ઇંચ) ની શક્યતા છે.</li> <li>કચ્છ: રાપર તાલુકામાં છૂટાછવાયા ઝાપટાં અને બાકીના વિસ્તારમાં 0.5 થી 1 ઇંચ અને એક-બે સેન્ટર પર 1.5 ઇંચ સુધીનો વરસાદ વરસી શકે છે.</li> <li>ઉત્તર ગુજરાત: વાવ-થરાદ, બનાસકાંઠા, પાટણ, મહેસાણા જેવા વિસ્તારમાં લગભગ 1 થી 2 ઇંચ સુધીનો વરસાદ વરસી શકે છે, જેમાં હારીજ, સમી, લાખણી, સુઈગામ, દિયોદર, ભાભર, ધાનેરા, ડીસા વગેરે વિસ્તારોનો સમાવેશ થાય છે. અરવલ્લી અને સાબરકાંઠામાં તીવ્રતા ઓછી રહીને હળવા ઝાપટાં જોવા મળશે.</li> </ul>