ગુજરાતમાં ગરમીનો કહેર: સુરેન્દ્રનગરમાં પારો 45.5°C ને પાર, જાણો ક્યારે મળશે મોટી રાહત?

<p><strong>Gujarat heatwave 2026:</strong> મે મહિનો શરૂ થતાં જ ગુજરાતમાં ગરમીએ જાણે ભુક્કા બોલાવવાનું શરૂ કરી દીધું છે. રાજ્યના પાંચ શહેરોમાં પારો 44°Cને પાર પહોંચી ગયો છે, જેમાં સુરેન્દ્રનગર 45.5°C સાથે સિઝનનું સૌથી ગરમ શહેર બની ગયું છે. આકરી ગરમીને કારણે લોકો ત્રાહિમામ પોકારી ગયા છે અને હીટ સ્ટ્રોકના કેસો વધતા આરોગ્ય વિભાગ પણ સતર્ક બન્યું છે. જોકે, આકાશમાંથી વરસી રહેલી આ આગ વચ્ચે એક રાહતના સમાચાર પણ છે કે દેશમાં ચોમાસું નિર્ધારિત સમય કરતાં 4 દિવસ વહેલું દસ્તક આપી શકે છે.</p> <p>હવામાન વિભાગ અને નિષ્ણાતોની આગાહી મુજબ, છેલ્લા પાંચ જ દિવસમાં ગરમીના પારામાં 2થી 4 ડિગ્રીનો ઉછાળો આવ્યો છે. અમદાવાદ, ગાંધીનગર, કંડલા એરપોર્ટ, અમરેલી અને સુરેન્દ્રનગર જેવા શહેરોમાં તો તાપમાન 44°Cની ઉપર જતું રહ્યું છે. સુરતની વાત કરીએ તો, 11 મેનો દિવસ ત્યાં સિઝનનો સૌથી ગરમ દિવસ રહ્યો, જ્યાં 42.2°C તાપમાન નોંધાયું હતું, જે સામાન્ય કરતાં 6.8°C વધારે છે. સોમવારે નોંધાયેલા તાપમાને તો આ સિઝનનો રેકોર્ડ જ તોડી નાખ્યો છે. આ પહેલાં કંડલા એરપોર્ટ પર 45.2°C તાપમાન નોંધાયું હતું, પરંતુ સુરેન્દ્રનગરે 45.5°C સાથે તે રેકોર્ડ તોડી નાખ્યો છે. જો હજુ 2 ડિગ્રીનો વધારો થશે, તો અગાઉના તમામ રેકોર્ડ તૂટી જવાની શક્યતા છે.</p> <p><iframe title="ABP Asmita | Headlines Today | Gujarat Politics | NEET Exam 2026 Cancelled | Gujarat Heatwave Alert" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p>આ કાળઝાળ ગરમીની સીધી અસર લોકોના સ્વાસ્થ્ય પર પડી રહી છે. રાજ્યમાં હીટ સ્ટ્રોક, લૂ લાગવી અને પેટમાં દુખાવાના કેસોમાં અચાનક ઉછાળો જોવા મળ્યો છે. જેને પગલે આરોગ્ય વિભાગ હરકતમાં આવ્યું છે અને હોસ્પિટલોમાં ખાસ હીટવેવ વોર્ડ અને બેડની વ્યવસ્થા કરવામાં આવી છે. તંત્ર દ્વારા લોકોને ખાસ અપીલ કરવામાં આવી છે કે બપોરના સમયે ખૂબ જરૂરી કામ ન હોય તો ઘરની બહાર નીકળવાનું ટાળવું અને ડીહાઇડ્રેશનથી બચવા માટે સતત પાણી પીતા રહેવું.</p> <p>ગરમીના આ પ્રકોપને જોતા હવામાન વિભાગે આગામી 17 મે સુધી રાજ્યભરમાં હીટવેવની આગાહી કરી છે. આજે (12 મે) કચ્છ અને સુરેન્દ્રનગરમાં 'ઓરેન્જ એલર્ટ' અપાયું છે, જ્યારે અમદાવાદ સહિતના અન્ય 12 જિલ્લાઓમાં 'યલો એલર્ટ' જાહેર કરવામાં આવ્યું છે. આગામી 3 દિવસ સુધી મહત્તમ તાપમાનમાં કોઈ મોટો ફેરફાર થવાની શક્યતા નથી અને વાતાવરણ એકદમ સૂકું રહેશે. જોકે, ત્યારબાદ તાપમાનમાં 2થી 3 ડિગ્રીનો ઘટાડો થઈ શકે છે. સાવચેતીના ભાગરૂપે સૌરાષ્ટ્રના દ્વારકા, રાજકોટ, બોટાદ, જૂનાગઢ, અમરેલી અને અન્ય વિસ્તારો જેવા કે બનાસકાંઠા, પાટણ, ગાંધીનગર, આણંદ, વડોદરા અને સુરતમાં પણ એલર્ટ આપવામાં આવ્યું છે.</p> <p><strong><a href="https://gujarati.abplive.com/news/india/tomorrow-weather-may-12-thunderstorm-alert-imd-11-states-winds-60-kmph-979760">આવતીકાલનું હવામાન: 11 રાજ્યોમાં વાવાઝોડા અને વરસાદનું એલર્ટ, 60 kmphની ઝડપે પવન ફૂંકાશે</a></strong></p> <p>આ બધા વચ્ચે ખુશખબર એ છે કે વરસાદની રાહ જોઈ રહેલા લોકો માટે ચોમાસું વહેલું આવી રહ્યું છે. સામાન્ય રીતે કેરળમાં ચોમાસું 1 જૂનની આસપાસ પહોંચતું હોય છે, પરંતુ આ વર્ષે તે 25થી 27 મેની વચ્ચે જ કેરળના કાંઠે પહોંચી જવાની સંભાવના છે. બંગાળની ખાડીના દક્ષિણ-પશ્ચિમ ભાગમાં એક નવી સિસ્ટમ સક્રિય થઈ છે, જે આગામી 48 કલાકમાં વધુ મજબૂત બનશે. આ સિસ્ટમ ચોમાસાને ઝડપથી આગળ વધારશે, જેનાથી દક્ષિણ ભારતના રાજ્યોમાં વરસાદનું પ્રમાણ વધશે. આજના તાપમાનની વાત કરીએ તો અમદાવાદ, ગાંધીનગર, રાજકોટ અને અમરેલીમાં 44°C, વડોદરામાં 45°C, ભુજમાં 42°C, સુરતમાં 41°C અને ડીસામાં 39°C આસપાસ મહત્તમ તાપમાન નોંધાઈ શકે છે.</p> <p><strong><a href="https://gujarati.abplive.com/news/gujarat/gujarat-heatwave-alert-44-degrees-orange-yellow-warning-for-next-4-days-979750">4 દિવસ બપોરે બહાર ન નીકળતા: તાપમાન 44°C પાર, 2 જિલ્લામાં ઓરેન્જ અને 12માં યલો એલર્ટ</a></strong></p>