Monsoon 2026: ચોમાસાની ગતિ કેમ ધીમી પડી? ગુજરાતમાં આ દિવસથી શરૂ થશે ધમાકેદાર વરસાદ

<p><strong>Gujarat monsoon arrival date:</strong> ચાલુ વર્ષે ચોમાસું પોતાની નિર્ધારિત ગતિ અને સમય કરતાં થોડું ધીમું ચાલી રહ્યું છે, જેના કારણે ગુજરાતમાં આ વખતે વરસાદ થોડો મોડો શરૂ થશે. હવામાન વિભાગના જણાવ્યા અનુસાર, પશ્ચિમી પવનો નબળા પડવાને કારણે ચોમાસાની પ્રગતિ અટકી ગઈ છે, જેથી દક્ષિણ ગુજરાતમાં 23 જૂન અને સૌરાષ્ટ્ર-મધ્ય ગુજરાતમાં 25 જૂન પછી ચોમાસું આગળ વધશે. રાજ્યમાં 23થી 26 જૂન વચ્ચે ચોમાસાની વિધિવત શરૂઆત થવાની સંભાવના છે. જોકે, રાહતના સમાચાર એ છે કે આગામી 7 દિવસ દરમિયાન રાજ્યના કેટલાક વિસ્તારોમાં પ્રી-મોન્સૂન એક્ટિવિટીના ભાગરૂપે હળવોથી મધ્યમ વરસાદ પડી શકે છે, જેનાથી ગરમીમાં આંશિક રાહત મળશે.</p> <p><strong>મુંબઈમાં પણ ચોમાસું મોડું પડ્યું</strong></p> <p>સામાન્ય રીતે મુંબઈમાં ચોમાસું 11 જૂન સુધીમાં બેસી જતું હોય છે, પરંતુ આ વર્ષે કેરળમાં 4 જૂને મોડું પહોંચ્યા બાદ ચોમાસાની રેખા હાલ મહારાષ્ટ્રના દક્ષિણ કોંકણ (હરનાઈ) આસપાસ અટકેલી છે. હવામાન વિભાગના અહેવાલો મુજબ, 18થી 19 જૂન આસપાસ પવનો મજબૂત થતાં મુંબઈમાં ચોમાસાની સત્તાવાર શરૂઆત થઈ શકે છે. હાલમાં નૈઋત્યનું ચોમાસું મહારાષ્ટ્ર, કર્ણાટક અને તેલંગાણાના બાકીના ભાગો તરફ આગળ વધવા માટે સાનુકૂળ પરિસ્થિતિ ધરાવે છે.</p> <p><iframe title="ABP Asmita | Headlines Today | Gujarat Politics | Latest Breaking News | Gujarat Unseasonal Rain" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p><strong>ગુજરાતમાં 7 દિવસ કેવું રહેશે હવામાન?</strong></p> <p>હવામાન વિભાગના ડાયરેક્ટર ડૉ. એ. કે. દાસના જણાવ્યા અનુસાર, આગામી 7 દિવસ દરમિયાન રાજ્યમાં તાપમાનમાં કોઈ મોટો ફેરફાર થવાની શક્યતા નથી. છેલ્લા 24 કલાકમાં ભાવનગરમાં સૌથી વધુ 41.4°C તાપમાન નોંધાયું હતું. અમદાવાદમાં આગામી દિવસોમાં વાદળછાયું વાતાવરણ રહેવાની શક્યતા છે. હવામાન વિભાગે આગામી દિવસો માટે વિગતવાર આ પ્રમાણે આગાહી કરી છે:</p> <p>15થી 17 જૂન: દક્ષિણ ગુજરાતના સુરત, ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં છૂટાછવાયા સ્થળોએ ગાજવીજ સાથે હળવોથી મધ્યમ વરસાદ પડી શકે છે. જ્યારે ઉત્તર ગુજરાત અને સૌરાષ્ટ્ર-કચ્છમાં હવામાન સંપૂર્ણપણે સૂકું રહેશે.</p> <p>18થી 19 જૂન: વરસાદનો વ્યાપ થોડો વધશે. દક્ષિણ ગુજરાતના છોટાઉદેપુર, નર્મદા, સુરત, ડાંગ, તાપી, નવસારી, વલસાડ ઉપરાંત સૌરાષ્ટ્રના દરિયાકાંઠાના વિસ્તારો જેવા કે અમરેલી, ભાવનગર, ગીર સોમનાથ અને દીવમાં પણ હળવો વરસાદ થવાની સંભાવના છે.</p> <p>19થી 21 જૂન: દક્ષિણ ગુજરાત અને સૌરાષ્ટ્રના દરિયાકાંઠાના ભાગોમાં હળવો વરસાદ ચાલુ રહેશે, જ્યારે ઉત્તર ગુજરાત અને કચ્છ પ્રદેશમાં હવામાન સૂકું રહેશે.</p> <p><strong>આ પણ વાંચોઃ <a href="https://gujarati.abplive.com/news/india/imd-weather-update-heavy-rain-thunderstorm-alert-bihar-maharashtra-delhi-ncr-982629">ચોમાસું કયા કયા રાજ્યોમાં આગળ વધ્યું? આગામી 7 દિવસ વાવાઝોડા સાથે મુશળધાર વરસાદની આગાહી</a></strong></p> <p><strong>દેશના અન્ય રાજ્યોની સ્થિતિ</strong></p> <p>ચોમાસાની ઉત્તરીય રેખા (NLM) હાલમાં હરનાઈ, સોલાપુર અને હૈદરાબાદ થઈને પસાર થઈ રહી છે. આગામી 4થી 5 દિવસમાં ચોમાસું મહારાષ્ટ્ર, કર્ણાટક, તેલંગાણા અને આંધ્રપ્રદેશના બાકીના ભાગો ઉપરાંત પશ્ચિમ બંગાળ, ઓડિશા, ઝારખંડ અને બિહાર તરફ આગળ વધશે. પશ્ચિમ રાજસ્થાનથી ગંગાના પશ્ચિમ બંગાળ સુધી સર્જાયેલી મોસમી ટ્રફ (હવાનું દબાણ) ના કારણે આગામી દિવસોમાં દેશના વિવિધ ભાગો સહિત ગુજરાતના દરિયાકાંઠાના વિસ્તારોમાં વરસાદી માહોલ જામશે.</p> <p><strong>આ પણ વાંચોઃ <a href="https://gujarati.abplive.com/news/india/tomorrow-weather-15-june-thunderstorm-heavy-rain-alert-delhi-up-bihar-mp-imd-982608">આવતીકાલનું હવામાનઃ લો-પ્રેશર સક્રિય થતાં દેશના આ 17 રાજ્યોમાં ભારે વરસાદ અને કરાનું એલર્ટ</a></strong></p>