Gujarat Rain: છેલ્લા 24 કલાકમાં 152 તાલુકામાં કમોસમી વરસાદ, ભાવનગરના મહુવામાં સૌથી વધુ પોણા આઠ ઈંચ વરસાદ

<p>અરબ સાગરમાં સર્જાયેલી સિસ્ટમના કારણે ગુજરાતમાં શિયાળામાં ચોમાસા જેવો માહોલ જોવા મળી રહ્યો છે. છેલ્લા 24 કલાકમાં રાજ્યના 152 તાલુકામાં વરસાદ નોંધાયો છે. 21 તાલુકામાં 2 ઈંચથી વધુ વરસાદ નોંધાયો હતો, જે પૈકી નવ તાલુકા તો એવા રહ્યા જ્યાં બેથી પોણા આઠ ઈંચ સુધી વરસાદ વરસ્યો હતો. છેલ્લા 24 કલાકમાં મહુવામાં 7.68 ઈંચ, સિહોર 5 ઈંચ વરસાદ વરસ્યો હતો.</p> <p>તે સિવાય પાલિતાણામાં 2.99 ઈંચ, ભાવનગર શહેરમાં 2.83 ઈંચ, જેસરમાં 2.64 ઈંચ, ઉમરાળામાં 2.13, તળાજામાં 1.89 ઈંચ, તો, વલ્લભીપુરમાં 1.50 ઈંચ વરસાદ ખાબક્યો હતો. તાપીના સોનગઢમાં 3.94 ઈંચ વરસાદ ખાબક્યો તો સુરતના ઉમરપાડામાં 3.66, સુરત શહેરમાં 1.89 ઈંચ, ઓલપાડમાં 1.26 ઈંચ વરસાદ ખાબકતા શહેર સહિત જિલ્લાભરમાં અનેક ઠેકાણે જળબંબાકારની&nbsp; સ્થિતિ જોવા મળી હતી.</p> <p>ગઈકાલ સવારથી આજ સુધીમાં ગીર સોમનાથના, ઉના અને સુત્રાપાડામાં 3.94 અને 3.11 ઈંચ વરસાદ, કોડીનારમાં 2.44 ઈંચ વરસાદ ખાબક્યો, જ્યારે અમરેલીના જાફરાબાદમાં 3.74, રાજુલામાં 3.03, સાવરકુંડલામાં 2.05, ખાભામાં 1.25 ઈંચ વરસાદ વરસ્યો હતો. નર્મદા જિલ્લાના સાગબારા, તિલકવાડા, ગરુડેશ્વર અને નાંદોદમાં બેથી અઢી ઈંચ વરસાદ ખાબક્યો હતો.</p> <p>છોટાઉદેપુરના ક્વાંટ અને સંખેડામાં 24 કલાકમાં દોઢથી બે ઈંચ વરસાદ વરસ્યો હતો. નવસારીના ખેરગામ, ગણદેવી સહિતના વિસ્તારમાં દોઢ-દોઢ ઈંચ વરસાદ ખાબક્યો હતો. જ્યારે, જાંબુઘોડા, સંખેડા, ઝઘડિયા, ડોલવણ, ઉચ્છલ, નડિયાદ,હાલોલ, કરજણ, હાંસોટ, ચીખલી, નીઝરમાં એકથી દોઢ ઈંચ સુધી વરસાદ વરસતો રહ્યો, છેલ્લા 24 કલાકમાં ખંભાત, અમરેલી શહેર, બોરસદ, કામરેજ, પેટલાદ, બારડોલી. ગીર ગઢડા, આણંદ, લાઠી સાવલી, બાબરા,ઘોઘા, માળિયા હાટિના અને વાપી તાલુકામાં અડધાથી એક ઈંચ વરસાદથી જનજીવન પ્રભાવિત થયું હતું.</p> <p>સૌરાષ્ટ્ર અને દક્ષિણ ગુજરાતના જિલ્લાઓ માટે આજનો દિવસ ભારે છે. અરબી સમુદ્રમાં સર્જાયેલા ડિપ્રેશનના કારણે રાજ્યમાં હજુ પણ આવનારા પાંચ દિવસ વરસાદી માહોલ યથાવત રહેશે. આજે અમરેલી, ગીર સોમનાથ અને દીવમાં ભારેથી અતિભારે વરસાદના અનુમાન સાથે ઓરેન્જ એલર્ટ અપાયું છે. આ તરફ કચ્છ, બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, મહિસાગર, ખેડા, અમદાવાદ, સુરેન્દ્રનગર, મોરબી, જામનગર, રાજકોટ, દ્વારકા, પોરબંદર, જૂનાગઢ, ભાવનગર, બોટાદ, આણંદ, ભરૂચ, સુરત, નવસારી, વલસાડ, સંઘપ્રદેશ દમણ અને દાદરાનગર હવેલીમાં છૂટ્ટાછવાયા સ્થળે ભારે વરસાદનું યલો એલર્ટ અપાયું છે. હવામાન વિભાગની આગાહી વચ્ચે અમરેલી, બોટાદ અને અમદાવાદમાં મોડીરાત્રીથી જ વરસાદ વરસી રહ્યો છે.&nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;</p>