રાજકોટમાં 23.91 લાખમાંથી 1.66 લાખ મતદારોના નામ રદ:SIR અંતર્ગત 8 વિધાનસભાની ડ્રાફ્ટ મતદાર યાદી જાહેર, 18 મી જાન્યુઆરી સુધી વાંધા અરજી રજૂ કરી શકાશે, 27 ફેબ્રુઆરીએ ફાઇનલ મતદાર યાદી

https://ift.tt/MxclEIe ભારતના ચૂંટણી પંચ દ્વારા તા.27 ઓક્ટોબરના Special Intensive Revision (SIR) એટલે કે 'ખાસ સઘન સુધારણા' કાર્યક્રમની જાહેરાત કરવામાં આવી હતી. જે બાદ તા.4 નવેમ્બરથી તા.14 ડિસેમ્બર દરમ્યાન Enumeration Form (EF) ગણતરી ફોર્મનો સમયગાળો નકકી કરવામાં આવ્યો હતો. જે અંતર્ગત રાજકોટ જિલ્લા વહીવટી તંત્ર દ્વારા 23.91 લાખ મતદારોની ચકાસણી પૂર્ણ થઈ ચૂકી છે. જેમાં 89,553 મૃત મતદારો મળી આવ્યા છે. જ્યારે 58,942 મતદારો સ્થળ પર હાજર મળી આવ્યા નથી તો 10,736 મતદારો ડુપ્લીકેટ મતદારો હોવાથી તેઓના નામ ડ્રાફટ મતદારયાદીમાંથી કમી કરવામાં આવ્યા છે. જ્યારે 7304 મતદારોના અન્ય કારણોથી નામ દૂર કરવામાં આવ્યા છે. આમ કુલ 1,66,535 મતદારોના નામ રદ થયા છે. આજે 19 ડિસેમ્બરના ડ્રાફ્ટ મતદાર યાદી જાહેર કર્યા બાદ હવે વર્ષ 2026માં 18 જાન્યુઆરી સુધી વાંધા અરજી કરી શકાશે. જેઓના હિયરિંગ બાદ 17 ફેબ્રુઆરીના ફાઇનલ મતદાર યાદી જાહેર કરવામાં આવશે. રાજકોટ જિલ્લા કલેકટર ડૉ. ઓમ પ્રકાશે જણાવ્યું હતું કે, રાજકોટ જિલ્લાની 8 વિધાનસભા મત વિસ્તારમાં સમાવિષ્ટ કુલ 23,91,027 મતદારોની BLO દ્વારા ખરાઈ કરવામાં આવી. જેમાંથી 8,23,668 મતદારોની વર્ષ 2002 ની મતદારયાદી સાથે સેલ્ફ મેપિંગ કરવામાં આવ્યું હતુ. જ્યારે 10,06,177 મતદારોનું વંશાવલી એટલે કે Progeny Mapping કરવામાં આવ્યુ હતુ. જ્યારે 2,25,512 મતદારો એવા છે કે જેઓનું મેપિંગ થઈ શક્યુ નથી. આ સાથે જ 89,553 મતદારો અવસાન પામ્યા હોવાનું સામે આવ્યુ છે. તેથી તેઓના નામો ડ્રાફટ મતદારયાદીમાંથી કમી કરવામાં આવ્યા છે. આ ઉપરાંત 58,942 મતદારો સ્થળ ઉપર હાજર મળી આવ્યા નથી. જેથી તેઓના નામ પણ ડ્રાફટ મતદારયાદીમાંથી દૂર કરવામાં આવ્યા છે. રાજકોટ જિલ્લામાં 1,69,135 મતદારો કાયમી સ્થળાંતર થયેલા છે. જ્યારે 10,736 મતદારો ડુપ્લીકેટ મતદારો હોવાથી તેઓના નામ ડ્રાફટ મતદારયાદીમાંથી કમી કરવામાં આવ્યા છે. જ્યારે 7304 મતદારોના અન્ય કારણોથી નામ દૂર કરવામાં આવ્યા છે. SIR ની કામગીરી દરમિયાન અત્યાર સુધીમાં રાજકીય પક્ષો સાથે 5 બેઠકો કરવામાં આવી છે. જે બાદ આજે 19 ડિસેમ્બરના જિલ્લામાં સમાવિષ્ટ તમામ 8 વિધાનસભા મતવિસ્તારની 'ખાસ સધન સુધારણા' કાર્યક્રમ અંતર્ગત ડ્રાફ્ટ રોલ એટલે કે મુસદ્દા મતદારયાદી (કાચી મતદાર યાદી) જાહેર કરવામાં આવેલી છે. તેમણે જણાવ્યું કે, આ યાદી કલેક્ટર કચેરી, તમામ મતદાર નોંધણી અધિકારીની કચેરી, મામલતદાર કચેરી/મદદનીશ મતદાર નોંધણી અધિકારીની કચેરી અને નિયુક્ત મતદાન મથકો પર જોઈ શકાશે. આ ઉપરાંત CEO Gujarat ની વેબસાઈટ પર પણ ઉપલબ્ધ છે. આ પ્રક્રિયામાં સંપૂર્ણ પારદર્શિતા રહે તે માટે તમામ માન્ય રાજકીય પક્ષોના પ્રતિનિધિઓને ડ્રાફ્ટ રોલની નકલી સોંપવામાં આવી છે. જેમાં ગેરહાજર, સ્થળાંતરિત અને મૃતક મતદારોની યાદી અલગથી તૈયાર કરી રાજકીય પક્ષોને અપાઈ છે. જેથી કોઈ ખોટા નામ રદ ન થાય તેની ખાતરી કરી શકાય. હવે 19 ડિસેમ્બર થી 18 જાન્યુઆરી સુધીમાં હક્ક-દાવા અને વાંધા અરજી રજૂ કરી શકાશે. જ્યારે 19 ડિસેમ્બરથી 10 ફેબ્રુઆરી,2026 સુધીમાં નોટીસનો તબકકો ચાલશે. જેમાં નોટીસ ઇશ્યુ કરવાની સાથે સુનાવણી અને ચકાસણી કરવામાં આવશે. આ દરમિયાન જેમની ઉંમર 1 જાન્યુઆરી, 2026 ના 18 વર્ષ પૂર્ણ થતી હોય તેવો નવું નામ નોંધાવવા માટે ફોર્મ નં.6 ભરી શકે છે. નામ રદ કરવા માટે ફોર્મ નં.7, નામ કે વિગતોમાં સુધારા-વધારા અથવા સરનામું બદલવા માટે ફોર્મ નં.8 ભરવાનું રહેશે. આખરી મતદાર યાદીની પ્રસિદ્ધિ 17 ફેબ્રુઆરી, 2026 ના રોજ થશે. SIR પ્રક્રિયા દરમિયાન જે મતદારોનું 2002 ની મતદારયાદી સાથે મેપીંગ થયેલ ન હોય તેવા મતદારોને નિયત પુરાવા રજૂ કરવા વિનંતી છે.