રવિવારે કચ્છ અને ઉત્તર ગુજરાત સાવધાન! 8 જિલ્લામાં તૂટી પડશે ભારે વરસાદ, IMD ની આગાહી

<p><strong>Kutch heavy rain alert:</strong> ગુજરાતમાં ઓગસ્ટ મહિનાની શરૂઆત જ મેઘરાજાની ધમાકેદાર અને રૌદ્ર બેટિંગ સાથે થઈ છે. શનિવારે (1 ઓગસ્ટ) સવારે 6 વાગ્યાથી રાત્રે 10 વાગ્યા સુધીના 16 કલાકના સમયગાળામાં જ રાજ્યના તમામ 254 તાલુકાઓમાં નાની-મોટી મેઘમહેર જોવા મળી છે. જેમાં સૌરાષ્ટ્રના મોરબી અને સુરેન્દ્રનગર જિલ્લામાં તો જાણે આભ ફાટ્યું હોય તેવી ભયંકર જળબંબાકારની સ્થિતિ સર્જાઈ છે. મોરબીમાં સૌથી વધુ પોણા 9 ઇંચ (8.78 ઇંચ) જેટલો તોફાની વરસાદ ખાબક્યો છે. જોકે, લોકો માટે સૌથી મોટા રાહતના સમાચાર એ છે કે આવતીકાલ એટલે કે સોમવાર (3 ઓગસ્ટ) થી રાજ્યભરમાં વરસાદનું જોર ધીમે ધીમે ઘટી જશે. તેમ છતાં, આજ માટે (રવિવાર, 2 ઓગસ્ટ) હજુ પણ કચ્છ અને ઉત્તર ગુજરાત સહિતના 8 જિલ્લાઓમાં ભારે વરસાદની આગાહી સાથે હવામાન વિભાગે 'યલો એલર્ટ' જાહેર કર્યું છે.</p> <p><strong>આગામી દિવસોની આગાહી: 2 થી 7 ઓગસ્ટ</strong></p> <p>હવામાન વિભાગ (IMD) ની લેટેસ્ટ આગાહી અનુસાર, આજે 2 ઓગસ્ટના રોજ કચ્છ, વાવ-થરાદ, બનાસકાંઠા, સાબરકાંઠા, મોરબી, પાટણ, મહેસાણા અને સુરેન્દ્રનગર એમ કુલ 8 જિલ્લાઓમાં ગાજવીજ સાથે ભારે વરસાદ ખાબકવાની પૂરેપૂરી શક્યતા છે. ત્યારબાદ, 3 થી 7 ઓગસ્ટના સમયગાળા દરમિયાન રાજ્યમાં વરસાદનું જોર નોંધપાત્ર રીતે ઘટતું જોવા મળશે. આ આગામી દિવસોમાં મોટાભાગે છૂટાછવાયા સ્થળોએ ગાજવીજ સાથે માત્ર હળવાથી મધ્યમ વરસાદ પડવાની જ સંભાવના છે.</p> <p><iframe title="ABP Asmita | Gujarat Weather Update | Headlines Today | Gujarat Politics | Gujarat Breaking News" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p><strong>સૌરાષ્ટ્રમાં મેઘરાજાનું રૌદ્ર સ્વરૂપ: મોરબી અને સુરેન્દ્રનગરમાં જળબંબાકાર</strong></p> <p>સ્ટેટ ઇમરજન્સી ઓપરેશન સેન્ટર (SEOC) ના સત્તાવાર આંકડાઓ મુજબ, છેલ્લા કેટલાક કલાકોમાં સૌથી વધુ પછડાટ મોરબી જિલ્લાના મોરબી તાલુકામાં જોવા મળી છે, જ્યાં 8.78 ઇંચ (223 mm) વરસાદ ખાબક્યો છે. મોરબીમાં બપોરે 2 થી 4 વાગ્યાના માત્ર બે કલાકના સમયગાળામાં જ 3 ઇંચ (77 mm) પાણી પડતા શહેરના માર્ગો નદીમાં ફેરવાઈ ગયા હતા. આ ઉપરાંત મોરબીના ટંકારામાં 7.64 ઇંચ (194 mm), હળવદમાં 6.42 ઇંચ (163 mm), માળિયામાં 4.80 ઇંચ (122 mm) અને વાંકાનેરમાં 4.53 ઇંચ (115 mm) વરસાદ નોંધાયો છે.</p> <p>સુરેન્દ્રનગર જિલ્લામાં પણ વરસાદે ભયંકર તારાજી સર્જી છે. ધ્રાંગધ્રા તાલુકામાં તો સવારે 10 થી 12 વાગ્યાની વચ્ચે ગણતરીની મિનિટોમાં જ 4.4 ઇંચ (112 mm) વરસાદ પડી ગયો હતો, અને કુલ આંકડો 6.93 ઇંચ (176 mm) પર પહોંચી ગયો હતો. આ સાથે વઢવાણમાં 6.18 ઇંચ (157 mm), લખતરમાં 4.49 ઇંચ (114 mm) (જ્યાં સવારે 8 થી 10 વચ્ચે 3.5 ઇંચ ખાબક્યો હતો), તેમજ મૂળી અને ચુડામાં 3.66 ઇંચ વરસાદ નોંધાયો છે.</p> <p><strong>આ પણ વાંચોઃ <a href="https://gujarati.abplive.com/news/surat/surat-heavy-rain-flood-relief-rescue-kim-river-water-overflow-updates-987360">સુરત જિલ્લામાં આભ ફાટ્યું: 24 કલાકમાં 24 ઈંચ વરસાદથી જળપ્રલય, આ વિસ્તારો પાણીમાં ગરકાવ</a></strong></p> <p><strong>દક્ષિણ, મધ્ય અને ઉત્તર ગુજરાતની સ્થિતિ</strong></p> <p>દક્ષિણ ગુજરાતમાં પણ મેઘરાજાની ધીમી અને મધ્યમ ધારે બેટિંગ ચાલુ રહી હતી. નર્મદા જિલ્લાના તિલકવાડામાં 4.65 ઇંચ (118 mm) અને ગરુડેશ્વરમાં 3.74 ઇંચ (95 mm) વરસાદ પડ્યો હતો. વલસાડ પંથકના નાનાપોંધામાં 4.45 ઇંચ (113 mm) અને કપરાડામાં 3.82 ઇંચ વરસાદ નોંધાયો છે. સાંજના સમયે સુરત અને ભરૂચ જિલ્લામાં વરસાદે જોર પકડ્યું હતું, જેમાં સુરતના ઓલપાડમાં 3.86 ઇંચ અને ભરૂચ શહેરમાં 3.74 ઇંચ પાણી પડ્યું હતું. મધ્ય ગુજરાતની વાત કરીએ તો ખેડા જિલ્લાના મહુધામાં 3.94 ઇંચ (100 mm) અને કઠલાલમાં 3.07 ઇંચ વરસાદ પડ્યો છે. જ્યારે ઉત્તર ગુજરાતના પાટણ (76 mm), દિયોદર (76 mm) અને દાંતા (72 mm) માં બપોરે 2 થી 6 વાગ્યા દરમિયાન ભારે વરસાદનો સ્પેલ જોવા મળ્યો હતો.</p> <p><strong>વરસાદનું સ્તર અને વર્ગીકરણ (છેલ્લા 16 કલાકમાં):</strong></p> <p>રાજ્યમાં પડેલા વરસાદનું વર્ગીકરણ કરીએ તો સ્થિતિ નીચે મુજબ રહી છે:</p> <p>4 ઇંચ (100 mm) થી વધુ: 11 તાલુકાઓ</p> <p>2 થી 4 ઇંચ (50 mm થી 99 mm): 45 તાલુકાઓ</p> <p>1 થી 2 ઇંચ (25 mm થી 49 mm): 65 તાલુકાઓ</p> <p>1 ઇંચથી ઓછો (1 mm થી 24 mm): 133 તાલુકાઓ</p> <p><strong>આ પણ વાંચોઃ <a href="https://gujarati.abplive.com/news/gujarat/gujarat-heavy-rain-forecast-4-active-systems-red-alert-6-districts-987351">ગુજરાત પર 4 સિસ્ટમ સક્રિય: આગામી 24 કલાક આ વિસ્તારમાં તૂટી પડશે વરસાદ, 6 જિલ્લામાં રેડ એલર્ટ</a></strong></p> <p><strong>રાજ્યના ટોપ-15 વરસાદી તાલુકાઓની યાદી</strong></p> <p>રાજ્યના ટોપ-15 વરસાદી તાલુકાઓના આંકડાઓ પર નજર કરીએ તો, સૌથી વધુ વરસાદ મોરબી જિલ્લાના મોરબી તાલુકામાં 223 mm (8.78 ઇંચ) નોંધાયો છે, જેમાં બપોરે 2 થી 4 વાગ્યાના સમયગાળામાં જ 77 mm વરસાદ ખાબક્યો હતો. મોરબી જિલ્લાના અન્ય તાલુકાઓમાં પણ મેઘમહેર જોવા મળી છે; જેમાં ટંકારામાં બપોરે 2 થી 4 વચ્ચે પડેલા 63 mm વરસાદ સાથે કુલ 194 mm (7.64 ઇંચ), હળવદમાં બપોરે 12 થી 2 વચ્ચે પડેલા 60 mm સાથે કુલ 163 mm (6.42 ઇંચ), માળિયામાં સવારે 10 થી 12 દરમિયાન પડેલા 63 mm સાથે કુલ 122 mm (4.80 ઇંચ) અને વાંકાનેરમાં સાંજે 4 થી 6 વાગ્યા વચ્ચે પડેલા 40 mm સાથે કુલ 115 mm (4.53 ઇંચ) વરસાદ નોંધાયો છે.</p> <p>બીજી તરફ સુરેન્દ્રનગર જિલ્લામાં પણ મેઘરાજાએ ભારે ધડબડાટી બોલાવી છે. ધ્રાંગધ્રામાં સવારે 10 થી 12 વાગ્યાની વચ્ચે જ 112 mm વરસાદ તૂટી પડતા કુલ આંકડો 176 mm (6.93 ઇંચ) પર પહોંચ્યો છે. આ ઉપરાંત વઢવાણમાં સવારે 6 થી 8 વાગ્યા દરમિયાન પડેલા 65 mm વરસાદ સાથે કુલ 157 mm (6.18 ઇંચ) અને લખતરમાં સવારે 8 થી 10 વચ્ચે પડેલા 90 mm સાથે કુલ 114 mm (4.49 ઇંચ) વરસાદ નોંધાયો છે.</p> <p>દક્ષિણ અને મધ્ય ગુજરાતના વિસ્તારોની વાત કરીએ તો, નર્મદાના તિલકવાડામાં સવારે 6 થી 8 વચ્ચે 70 mm સાથે કુલ 118 mm (4.65 ઇંચ) અને ગરુડેશ્વરમાં એ જ સમયગાળામાં પડેલા 52 mm સાથે કુલ 95 mm (3.74 ઇંચ) વરસાદ પડ્યો છે. વલસાડના નાનાપોંધામાં સાંજે 6 થી 8 વાગ્યા વચ્ચે 29 mm સાથે કુલ 113 mm (4.45 ઇંચ) અને કપરાડામાં આ જ સમયે પડેલા 31 mm સાથે કુલ 97 mm (3.82 ઇંચ) વરસાદ નોંધાયો છે. જ્યારે ખેડા જિલ્લાના મહુધામાં બપોરે 2 થી 4 વાગ્યા વચ્ચે 56 mm સાથે કુલ 100 mm (3.94 ઇંચ), સુરતના ઓલપાડમાં બપોરે 12 થી 2 વાગ્યા વચ્ચે 24 mm સાથે કુલ 98 mm (3.86 ઇંચ) અને ભરૂચ તાલુકામાં સાંજના સમયે પડેલા વરસાદ સાથે કુલ 95 mm (3.74 ઇંચ) વરસાદ ખાબક્યો છે.</p>