બહુમતી ભાજપ પાસે પણ લાઠી તાલુકા પંચાયતમાં પ્રમુખ બનશે AAPના! જાણો શું છે આખો રાજકીય ખેલ

<p><strong>Lathi Taluka Panchayat Election:</strong> અમરેલી જિલ્લાની 11 તાલુકા પંચાયતોના પ્રમુખોની આવતીકાલે વરણી થવા જઈ રહી છે, પરંતુ સૌથી વધુ ચર્ચા લાઠી તાલુકા પંચાયતની થઈ રહી છે. અહીં રાજકારણમાં એક મોટો ઉલટફેર જોવા મળ્યો છે. લાઠીમાં સ્પષ્ટ બહુમતી ભાજપ પાસે હોવા છતાં, પ્રમુખ પદની ખુરશી પર આમ આદમી પાર્ટી (AAP) ના ઉમેદવાર બેસે તેવી સ્થિતિનું નિર્માણ થયું છે. પ્રમુખ પદ OBC મહિલા માટે અનામત હોવાથી, ભાજપે પોતાના પક્ષમાં યોગ્ય ઉમેદવાર ન હોવાથી 'ઉછીના ઉમેદવાર' તરીકે AAP ના મહિલા સભ્યને ટેકો આપીને ફોર્મ ભરાવ્યું છે. આ ઘટનાથી સ્થાનિક રાજકારણમાં ભારે ગરમાવો આવી ગયો છે અને ભાજપ, કોંગ્રેસ તેમજ AAP વચ્ચે સીધો જંગ જામ્યો છે.</p> <p>લાઠી તાલુકા પંચાયતનું સંખ્યાબળ જોઈએ તો કુલ સભ્યોમાંથી 10 સભ્યો ભાજપના, 4 AAP ના અને 2 કોંગ્રેસના ચૂંટાયેલા છે. આંકડાકીય રીતે ભાજપ પાસે મજબૂત બહુમતી છે, પરંતુ આ વખતે પ્રમુખ પદ OBC મહિલા માટે અનામત છે. ભાજપના 10 સભ્યોમાંથી કોઈ OBC મહિલા સભ્ય ન હોવાથી પાર્ટી મૂંઝવણમાં મુકાઈ હતી. આનો રસ્તો કાઢતા ભાજપે સભાડિયા બેઠક પરથી ચૂંટાયેલા AAP ના મહિલા સભ્ય રમીલાબેન કુનકીયા સાથે ગઠબંધન કરી લીધું છે અને ભાજપના ટેકાથી રમીલાબેને પ્રમુખ પદ માટે દાવેદારી નોંધાવી છે.</p> <p><iframe title="ABP Asmita | Headlines Today | Gujarat Politics | Latest Breaking News | Gujarat Unseasonal Rain" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p>ભાજપના આ રાજકીય દાવથી આમ આદમી પાર્ટી નારાજ છે. AAP ના મહામંત્રીએ સીધો આરોપ લગાવ્યો છે કે ભાજપે તેમના મહિલા સભ્યને હાઈજેક કરીને પોતાની તરફ ખેંચી લીધા છે. જોકે, આમ આદમી પાર્ટીએ હાર માન્યા વગર પોતાના તરફથી સત્તાવાર રીતે ક્રિષ્નાબેન ખુમાણને પ્રમુખ પદના ઉમેદવાર તરીકે મેદાનમાં ઉતાર્યા છે.</p> <p><strong>આ પણ વાંચોઃ <a href="https://gujarati.abplive.com/news/gujarat/jamnagar-lalpur-taluka-panchayat-bjp-divyaaba-president-aap-far-from-power-980826">જામનગર: લાલપુરમાં બહુમતી છતાં AAP સત્તાથી દૂર, ભાજપના દિવ્યાબા બન્યા પ્રમુખ, જાણો શું થયો ખેલ?</a></strong></p> <p>બીજી તરફ, આ રાજકીય ખેંચતાણમાં કોંગ્રેસ પણ પાછળ રહી નથી. જાણીતા લોકસાહિત્યકાર માયાભાઈ આહિરની દીકરીને ચૂંટણીમાં હરાવીને ચર્ચામાં આવેલા કોંગ્રેસના સભ્ય શાંતાબેન ડેરે પણ પ્રમુખ પદ માટે પોતાનું ફોર્મ ભર્યું છે.</p> <p>ઉમેદવારી ફોર્મ ભરતી વખતે સાંસદ ભરત સુતરીયા, જિલ્લા ભાજપ મહામંત્રી ચેતન શિયાળ, કોંગ્રેસના મહિલા નેતા જેનીબેન ઠુમ્મર અને AAP ના આગેવાનો મોટી સંખ્યામાં હાજર રહ્યા હતા. હવે આવતીકાલે લાઠી તાલુકા પંચાયતના પ્રમુખ પદ માટે ભાજપ પ્રેરિત AAP ઉમેદવાર, મૂળ AAP ઉમેદવાર અને કોંગ્રેસ વચ્ચે રસપ્રદ ત્રિપાંખિયો જંગ ખેલાશે.</p>