Accident: અંબાજી જતા 16 પદયાત્રીઓને અડફેટે લેનારો કારચાલક ઝડપાયો, ટોળાએ ધૂલાઇ કરી, વીડિયો આવ્યો સામે

<p><strong>Sabarkantha Himmatnagar Accident:</strong> અંબાજીમાં ભાદરવી પૂનમના મહામેળાને લઇ પદયાત્રીઓ અંબાજી જઇ રહ્યાં છે, ત્યારે સાબરકાંઠામાં એક દૂર્ઘટના ઘટી છે. હિંમતનગરમાં નશામાં ધૂત કાર ચાલકે 16 પદયાત્રીઓને અડફેટે લેતા એકનું પદયાત્રીનું મોત થયુ હતુ. આ ઘટનાથી ઉશ્કેરાયેલા ટોળાએ કાર સળગાવી દીધી હતી. હાલમાં આ ઘટનાનો એક વીડિયો સામે આવ્યો છે. </p> <p><iframe title="ABP Asmita | Ahmedabad Rath Yatra 2026 LIVE Update | Gujarat Monsoon | Gujarat Politics | LIVE" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p>કારચાલકનો એક વીડિયો સામે આવ્યો છે, જેમાં અંબાજી જઇ રહેલા પદયાત્રીઓના ટોળાએ કારચાલકને ઝડપી પાડ્યો હતો, અને રોડ પર જ ધુલાઇ શરૂ કરી દીધી હતી. રોષે ભરાયેલા ટોળાએ કારચાલકને ગડદાપાટુથી બરાબર મેથીપાક ચખાડ્યો હતો, જોકે, બાદમાં પોલીસના હવાલે કરી દેવામાં આવ્યો હતો.</p> <p>સાબરકાંઠા જિલ્લાના હિંમતનગર નજીક દોલગઢ પાટિયા પાસે નશામાં ધૂત કાર ચાલકે 16 પદયાત્રીઓને અડફેટે લેતા નાના ચેખલા ગામના મોહનભાઈ વાઘેલાનું સારવાર દરમિયાન મોત નીપજ્યું છે, જ્યારે અન્ય ઈજાગ્રસ્તો સારવાર હેઠળ છે. ઘટનાથી ઉશ્કેરાયેલા પદયાત્રીઓએ દારૂડિયા ચાલકની ધોલાઈ કરી કારને આગ ચાંપી દીધી હતી, જે બાદ ઉચ્ચ પોલીસ અને વહીવટી અધિકારીઓએ હોસ્પિટલ પહોંચી તપાસ હાથ ધરી છે.</p> <p>સાબરકાંઠાના હિંમતનગર-અંબાજી ફોરલેન હાઇવે પર દોલગઢ પાટિયા નજીકથી પસાર થઈ રહેલા પદયાત્રીઓના સમૂહને એક પૂરઝડપે આવતી કારે અડફેટે લીધા હતા. આ અકસ્માતમાં 16 જેટલા પદયાત્રીઓ ગંભીર રીતે ઈજાગ્રસ્ત થતા ઘટનાસ્થળે અફરાતફરીનો માહોલ સર્જાયો હતો. અકસ્માત સર્જી ભાગવાનો પ્રયાસ કરી રહેલા કારચાલકની અંદરથી દારૂની બોટલ મળી આવતા પદયાત્રીઓ અને સ્થાનિક લોકોનો રોષ ફાટી નીકળ્યો હતો. ઉશ્કેરાયેલા ટોળાએ રોડ પર જ દારૂડિયા ચાલકને ઢસડીને માર માર્યો હતો અને તેની કારને આગ ચાંપી દેતા કાર સંપૂર્ણ ભડકે બળી ગઈ હતી. ઘટના અંગેના વીડિયો પણ સોશિયલ મીડિયામાં વાયરલ થયા છે.</p> <p>ઈજાગ્રસ્ત થયેલા 16 શ્રદ્ધાળુઓને તાત્કાલિક સારવાર અર્થે ખસેડાયા હતા, જેમાંથી 12 લોકોને હિંમતનગર સિવિલ હોસ્પિટલ અને 4 દર્દીઓને ખાનગી હોસ્પિટલમાં ભરતી કરાયા છે. સારવાર દરમિયાન નાના ચેખલા ગામના મોહનભાઈ રમણભાઈ વાઘેલા નામના શ્રદ્ધાળુનું મોત નીપજ્યું છે. બનાવની ગંભીરતાને ધ્યાને લઈ જિલ્લા પોલીસ વડા ડો. પાર્થરાજસિંહ ગોહિલ, કલેક્ટર, પ્રાંત અધિકારી અને મામલતદાર સહિતનો કાફલો સિવિલ હોસ્પિટલ પહોંચ્યો હતો. સાબરકાંઠાના સાંસદ શોભનાબેન બારૈયા તથા સ્થાનિક ધારાસભ્યએ પણ હોસ્પિટલ પહોંચી ઈજાગ્રસ્તોની મુલાકાત લીધી હતી. ફોરલેન હાઇવે પર પદયાત્રીઓની સુરક્ષાનું જાહેરનામું હોવા છતાં બેફામ ડ્રાઇવિંગના કારણે આ દુર્ઘટના સર્જાઈ હોવાનું સામે આવ્યું છે.</p> <p>આ ઘટના હાઇવે પર પદયાત્રીઓની સુરક્ષા અને દારૂબંધીના કડક અમલ સામે ગંભીર સવાલો ઊભા કરે છે. કાયદો અને વ્યવસ્થાની સ્થિતિ જાળવવા પોલીસે કારચાલકની અટકાયત કરી ગુનો નોંધ્યો છે, પરંતુ આવા વાહનચાલકો સામે દાખલારૂપ કડક કાર્યવાહી જ ભવિષ્યમાં નિર્દોષ પદયાત્રીઓના જીવ બચાવી શકશે. </p>