Gujarat Rain: ગુજરાતમાં વરસાદ અંગે અંબાલાલ પટેલની આગાહી, જન્માષ્ટમીથી 20 સપ્ટેમ્બર સુધી મેઘમહેરના યોગ

<p><strong>Gujarat Rain:</strong> જાણીતા હવામાન નિષ્ણાત અંબાલાલ પટેલે આજે ગુજરાતમાં જન્માષ્ટમીથી લઈને 20 સપ્ટેમ્બર સુધી રાજ્યના વિવિધ ભાગોમાં હળવાથી ભારે વરસાદ થવાની આગાહી કરી છે. પવનની ગતિ અને બંગાળની ખાડીની સિસ્ટમના કારણે દક્ષિણ, મધ્ય, સૌરાષ્ટ્ર અને કચ્છના વિસ્તારોમાં વરસાદી માહોલ સર્જાશે, જેનાથી ખેડૂતો અને સામાન્ય જનતાને ભારે રાહત મળશે.</p> <p><iframe title="ABP Asmita | Ahmedabad Rath Yatra 2026 LIVE Update | Gujarat Monsoon | Gujarat Politics | LIVE" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p> <p>અંબાલાલ પટેલના જણાવ્યા અનુસાર, આજે જન્માષ્ટમીના પવિત્ર દિવસે બપોર પછી આકાશમાં ઘનઘોર વાદળો ઘેરાશે અને કેટલાક ભાગોમાં ઝાપટાં કે હળવો વરસાદ પડી શકે છે. ત્યારબાદ 6 થી 10 સપ્ટેમ્બર દરમિયાન ઉત્તર ગુજરાત, મધ્ય ગુજરાત, પંચમહાલ તેમજ દક્ષિણ ગુજરાત અને સૌરાષ્ટ્રમાં હળવાથી મધ્યમ વરસાદની પૂરી શક્યતા છે. પવનની ઝડપના કારણે ક્યાંક હળવા મધ્યમથી એક ઇંચ જેટલો વરસાદ નોંધાઈ શકે છે. આ સિવાય, 10 સપ્ટેમ્બરની આસપાસ બંગાળના ઉપસાગરમાં એક અત્યંત મજબૂત વરસાદી સિસ્ટમ સક્રિય થવાની સંભાવના છે. જો અલનીનોની પ્રતિકૂળ અસર નહીં વર્તાય, તો મધ્ય ગુજરાતના વડોદરા અને આણંદ જિલ્લાના ભાગોમાં ભારેથી અતિભારે વરસાદ પડી શકે છે, જ્યાં કોઈ કોઈ સ્થળે 3 ઇંચથી વધુ વરસાદ થવાની ક્ષમતા છે. તે જ પ્રમાણે દક્ષિણ ગુજરાતના વિસ્તારોમાં ૫ ઇંચ કે તેથી વધુ વરસાદ ખાબકી શકે છે. સૌરાષ્ટ્રના દ્વારકા, પોરબંદર અને જામનગર તેમજ કચ્છ અને ગાંધીધામના વિસ્તારોમાં પણ સારો વરસાદ પડવાના સાનુકૂળ સંકેતો મળી રહ્યા છે.</p> <p>એકંદરે 20 સપ્ટેમ્બર સુધીમાં રાજ્યના અનેક ભાગોમાં સારા વરસાદના યોગ બની રહ્યા છે. આગામી દિવસોમાં થનારો આ વરસાદ કૃષિ પાક માટે સંજીવની સમાન સાબિત થશે અને જળાશયોમાં પાણીની આવક વધારશે. હવામાન વિભાગ અને અંબાલાલ પટેલની આ સાનુકૂળ આગાહીથી ખેડૂત આલમમાં ખુશીની લહેર વ્યાપી ગઈ છે.</p>