Gujarat Govt Jobs: સરકારી નોકરીનું સપનું પૂરું! આજે 4473 યુવાનોને મળ્યા સરકારી નોકરીના ઓર્ડર, CM ભૂપેન્દ્ર પટેલે નિમણૂકપત્રો એનાયત કર્યા

<p><strong>Gujarat Govt Jobs:</strong> ગુજરાતના હજારો શિક્ષિત બેરોજગાર યુવાનો માટે આજનો શનિવાર સોનાનો સૂરજ લઈને ઉગ્યો છે. રાજ્ય સરકાર દ્વારા પારદર્શક ભરતી પ્રક્રિયાના ભાગરૂપે આજે એક ભવ્ય સમારોહમાં કુલ 4473 ઉમેદવારોને સરકારી નોકરીના નિમણૂકપત્રો એનાયત કરવામાં આવ્યા છે. ગાંધીનગર સ્થિત મહાત્મા મંદિર ખાતે સાંજે 4 વાગ્યે આયોજિત આ કાર્યક્રમમાં મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીની વિશેષ ઉપસ્થિતિમાં યુવાનોના સપના સાકાર થયા હતા. લાંબા સમયની મહેનત બાદ સરકારી નોકરી મળતા હજારો પરિવારોમાં ખુશીની લહેર જોવા મળી હતી.</p> <p><strong>મહાત્મા મંદિરમાં યુવા શક્તિનો ઉત્સાહ</strong></p> <p>ગુજરાત સરકારના વિવિધ વિભાગોમાં ખાલી પડેલી જગ્યાઓ ભરવા માટે લેવાયેલી સ્પર્ધાત્મક પરીક્ષાઓમાં ઉત્તીર્ણ થયેલા તેજસ્વી તારલાઓનું આજે બહુમાન કરવામાં આવ્યું હતું. ગુજરાત ગૌણ સેવા પસંદગી મંડળ (GSSSB) દ્વારા હાથ ધરવામાં આવેલી ભરતી પ્રક્રિયાના અંતે પસંદગી પામેલા 4473 ઉમેદવારોને આજે વિધિવત રીતે રાજ્ય સેવામાં જોડાવા માટેના ઓર્ડર આપવામાં આવ્યા હતા. મુખ્યમંત્રી ભૂપેન્દ્ર પટેલે આ પ્રસંગે યુવાનોને શુભેચ્છા પાઠવતા જણાવ્યું હતું કે, પારદર્શક અને ઝડપી ભરતી પ્રક્રિયા એ સરકારની પ્રાથમિકતા છે અને આ નિમણૂકો વહીવટી તંત્રને વધુ સુદ્રઢ બનાવશે.</p> <p><strong>વિવિધ સંવર્ગોમાં થયેલી ભરતીની વિગતો</strong></p> <p>રાજ્ય સરકારના અલગ-અલગ વિભાગોમાં વર્ગ-3 ની વિવિધ જગ્યાઓ માટે લાયક ઉમેદવારોની પસંદગી કરવામાં આવી છે. જેમાં સૌથી વધુ ભરતી ક્લાર્ક સંવર્ગમાં થઈ છે. આજના કાર્યક્રમમાં નીચે મુજબના પદો માટે નિમણૂકપત્રો એનાયત કરવામાં આવ્યા હતા:</p> <p>જુનિયર ક્લાર્ક (વર્ગ-3): સૌથી મોટી સંખ્યામાં એટલે કે 2828 ઉમેદવારોને નિમણૂક મળી છે.</p> <p>આસિસ્ટન્ટ/આસિસ્ટન્ટ ડેપો મેનેજર: કુલ 346 ઉમેદવારોની પસંદગી.</p> <p>સિનિયર ક્લાર્ક (વર્ગ-3): 339 ઉમેદવારોને બઢતી સમાન સીધી ભરતીનો લાભ મળ્યો.</p> <p>ઓફિસ આસિસ્ટન્ટ: કુલ 174 ઉમેદવારો.</p> <p>હિસાબનીશ (વર્ગ-3): 165 ઉમેદવારો.</p> <p>સમાજ કલ્યાણ નિરીક્ષક (વર્ગ-3): 144 ઉમેદવારો.</p> <p>હેડ ક્લાર્ક (વર્ગ-3): 138 ઉમેદવારો.</p> <p>પેટા હિસાબનીશ (વર્ગ-3): 71 ઉમેદવારો.</p> <p>મદદનીશ આદિજાતિ વિકાસ અધિકારી (વર્ગ-3): 63 ઉમેદવારો.</p> <p>સબ રજીસ્ટ્રાર (ગ્રેડ-2): 47 ઉમેદવારો.</p> <p>સબ રજીસ્ટ્રાર (ગ્રેડ-1): 45 ઉમેદવારો.</p> <p>સર્વેયર: 39 ઉમેદવારો.</p> <p>ડેપો મેનેજર: 24 ઉમેદવારો.</p> <p>સ્ટેમ્પ્સ નિરીક્ષક (વર્ગ-3): 22 ઉમેદવારો.</p> <p>મદદનીશ સમાજ કલ્યાણ અધિકારી (વર્ગ-3): 20 ઉમેદવારો.</p> <p>ગૃહપતિ: 8 ઉમેદવારો.</p> <p><strong>પારદર્શક વહીવટ તરફ એક કદમ</strong></p> <p>સરકારી નોકરી માટેની આતુરતાથી રાહ જોઈ રહેલા ઉમેદવારો માટે આ કાર્યક્રમ એક ઉત્સવ સમાન બની રહ્યો હતો. નાયબ મુખ્યમંત્રી હર્ષ સંઘવીએ જણાવ્યું હતું કે, મેરિટના આધારે અને કોઈપણ શેહશરમ વિના થયેલી આ ભરતી યુવાનોનો સરકાર પરનો વિશ્વાસ વધુ મજબૂત કરશે. એક સાથે આટલી મોટી સંખ્યામાં નિમણૂકો થવાથી રાજ્યના વહીવટી તંત્રમાં નવી ઊર્જાનો સંચાર થશે અને પ્રજાલક્ષી કામગીરી વધુ વેગવંતી બનશે.</p>