ગુજરાતના MSME માટે નવી સહાય યોજના જાહેર:માઇક્રો-સ્મોલ ઉદ્યોગોને મૂડીથી ટેક્નોલોજી સુધી સરકારની મદદ, કેટેગરી-Aમાં 45% સુધી પ્રોત્સાહન; થ્રસ્ટ સેક્ટરમાં 50% સુધી લાભ

https://ift.tt/DJzOolm ગુજરાત સરકારે Viksit Gujarat Industrial Policy-2026 હેઠળ માઇક્રો, સ્મોલ અને મિડિયમ એન્ટરપ્રાઇઝિસ (MSME) માટે નવી સહાય યોજના જાહેર કરી છે. ઉદ્યોગ અને ખાણ વિભાગ દ્વારા 25 સપ્ટેમ્બર, 2026ના રોજ જાહેર કરાયેલી આ યોજના 1 જૂન, 2026થી અમલમાં આવી છે અને 31 મે, 2031 સુધી પાંચ વર્ષ માટે અમલમાં રહેશે. નવી યોજના હેઠળ MSMEને મૂડી રોકાણ, વ્યાજ, વીજળી સહિત વિવિધ ક્ષેત્રોમાં નાણાકીય સહાય અને પ્રોત્સાહન આપવામાં આવશે. કેટેગરી પ્રમાણે EFCI પર પ્રોત્સાહન યોજના હેઠળ પાત્ર MSMEને Eligible Fixed Capital Investment (EFCI) ના આધારે સહાય આપવામાં આવશે. કેટેગરી-A વિસ્તારમાં 45% સુધી અને કેટેગરી-B વિસ્તારમાં 35% સુધી વિવિધ પ્રોત્સાહનોનો લાભ મળી શકશે. જ્યારે પસંદગીના Thrust Sectorમાં આવતા ઉદ્યોગો માટે કુલ સહાયની મર્યાદા અનુક્રમે 50% અને 45% સુધી રહેશે. મૂડી, વ્યાજ અને પાવર ટેરિફમાં સહાય નવી યોજનામાં ઉદ્યોગોને માત્ર મૂડી રોકાણ પૂરતી સહાય નહીં, પરંતુ વ્યાજ સબસિડી અને પાવર ટેરિફ સબસિડી જેવા લાભો પણ આપવામાં આવ્યા છે. ઉદ્યોગોના આધુનિકીકરણ, વિસ્તરણ અને ઉત્પાદન ક્ષમતા વધારવા માટે પણ નીતિમાં પ્રોત્સાહનની જોગવાઈ કરવામાં આવી છે. નવા કર્મચારીઓના EPFનું 5 વર્ષ સુધી રિઇમ્બર્સમેન્ટ રોજગારી સર્જનને પ્રોત્સાહન આપવા માટે નવા કર્મચારીઓ સંબંધિત EPF ખર્ચનું પાંચ વર્ષ સુધી રિઇમ્બર્સમેન્ટ કરવાની જોગવાઈ છે. સાથે જ ગુજરાતમાં સ્થાનિક રોજગાર વધે તે માટે ઉદ્યોગોના કુલ કર્મચારીઓમાંથી ઓછામાં ઓછા 85% ગુજરાત ડોમિસાઇલ હોવાની શરત રાખવામાં આવી છે. મહિલા ઉદ્યોગસાહસિકો અને સ્ટાર્ટઅપને વધારાનો લાભ મહિલા ઉદ્યોગસાહસિકો તથા સ્ટાર્ટઅપ્સને પણ નીતિમાં વિશેષ પ્રોત્સાહન આપવામાં આવ્યું છે. આવા પાત્ર ઉદ્યોગોને સામાન્ય લાભ ઉપરાંત 1% વધારાની વ્યાજ સબસિડી મળવાની જોગવાઈ કરવામાં આવી છે. ટેક્નોલોજીથી પેટન્ટ સુધી અનેક ક્ષેત્રમાં સહાય MSMEને ટેક્નોલોજીકલ રીતે સક્ષમ બનાવવા માટે ટેક્નોલોજી અપગ્રેડેશન, પેટન્ટ, ERP અને ICT અપનાવવા, ગુણવત્તા પ્રમાણપત્ર મેળવવા, ઊર્જા અને પાણીની બચત સહિતના વિવિધ ખર્ચ માટે પણ સહાયની જોગવાઈ છે. સરકારનો હેતુ MSMEને પરંપરાગત નાના-મધ્યમ વ્યવસાયની મર્યાદામાંથી બહાર લાવી વધુ ટેક્નોલોજી આધારિત અને સ્પર્ધાત્મક ઉદ્યોગ તરીકે વિકસાવવાનો છે. વિસ્તરણ અને વૈવિધ્યકરણ કરનારા ઉદ્યોગોને પણ લાભ નીતિમાં હાલના ઉદ્યોગો માટે Expansion અને Diversificationને પણ પ્રોત્સાહન આપવામાં આવ્યું છે. દસ્તાવેજ મુજબ નવા પ્રોજેક્ટ માટે અલગથી ઓળખી શકાય તેવું ફિક્સ્ડ કેપિટલ ઇન્વેસ્ટમેન્ટ હોવું જરૂરી રહેશે. હાલના ઉદ્યોગ દ્વારા અન્ય સ્થળે વિસ્તરણ કરવામાં આવે તો નિર્ધારિત શરતો પૂર્ણ થવા પર તેને નવા યુનિટ તરીકે ગણવાની જોગવાઈ પણ છે. સરકારના જણાવ્યા મુજબ, MSME ક્ષેત્રને ટેક્નોલોજી, નાણાં, બજાર, કૌશલ્ય વિકાસ અને ઈન્ફ્રાસ્ટ્રક્ચર સાથે જોડીને ગુજરાતમાં રોજગાર, ઉદ્યોગસાહસિકતા અને વૈશ્વિક સ્પર્ધાત્મકતા વધારવાનો આ યોજનાનો મુખ્ય હેતુ છે.