ગુજરાતમાં કયા જિલ્લા દુષ્કાળગ્રસ્ત જાહેર થશે? જાણો મંત્રી બાવળિયાનું મોટું નિવેદન

<p><strong>Gujarat Drought Crisis:</strong> ગુજરાતમાં અપૂરતા વરસાદને કારણે ખેડૂતો અને માલધારીઓની ચિંતા વધી ગઈ છે. કયા જિલ્લાને દુષ્કાળગ્રસ્ત કે અર્ધદુષ્કાળગ્રસ્ત જાહેર કરવામાં આવશે તેને લઈને હજુ પણ સસ્પેન્સ યથાવત છે.</p> <p>સરકાર અને વિપક્ષ વચ્ચે આ મુદ્દે શાબ્દિક યુદ્ધ શરૂ થઈ ગયું છે. એક તરફ સરકાર પોતાની યોજનાઓના ફાયદા ગણાવી રહી છે, તો બીજી તરફ ખેડૂત નેતાઓ જમીની વાસ્તવિકતાનો હવાલો આપી રહ્યા છે.</p> <p>ખાસ કરીને સૌરાષ્ટ્રના ઘણા વિસ્તારોમાં ખેતી અને પીવાના પાણીની મોટી સમસ્યા ઊભી થઈ છે. ત્યારે રાજ્યની જનતા મીટ માંડીને બેઠી છે કે સરકાર ક્યારે સત્તાવાર જાહેરાત કરશે.</p> <p><strong>સરકારનો પક્ષ અને આગામી આયોજન</strong></p> <p>રાજ્યના કેબિનેટ મંત્રી કુંવરજી બાવળિયાએ આ મામલે નિવેદન આપતા જણાવ્યું છે કે, ખેત ઉત્પાદનના આંકડા અને વિસ્તૃત સર્વે બાદ જ દુષ્કાળગ્રસ્ત જિલ્લાઓની જાહેરાત કરવામાં આવશે.</p> <p>મંત્રીના દાવા મુજબ, દ્વારકા અને પોરબંદર સહિતના અસરગ્રસ્ત જિલ્લાઓમાંથી ખેત ઉત્પાદનના પ્રાથમિક આંકડા તૈયાર કરી લેવામાં આવ્યા છે. ત્યારબાદ જ આગળની સત્તાવાર કાર્યવાહી થશે.</p> <p>તેમણે સ્પષ્ટ કર્યું હતું કે હાલની સરકારી યોજનાઓને કારણે અગાઉના દાયકાઓ જેવી દુષ્કાળની ગંભીર સ્થિતિ હવે રહી નથી. સરકાર પાસે પીવાના પાણી અને ઘાસચારાનું પૂરતું આયોજન છે.</p> <p><strong>પાણી અને ઘાસચારા માટેની વ્યવસ્થા</strong></p> <p>મંત્રી બાવળિયાએ વધુમાં જણાવ્યું હતું કે અસરગ્રસ્ત જિલ્લાઓમાં આવેલા તળાવોની આસપાસ ઘાસ ઉગાડવા માટે સ્થાનિક તંત્રને જરૂરી આદેશ આપી દેવામાં આવ્યા છે.</p> <p>સિંચાઈના પાણી અંગે સ્પષ્ટતા કરતા તેમણે કહ્યું કે, સરકારની પહેલી પ્રાથમિકતા પીવાનું પાણી છે. પીવાનું પાણી રિઝર્વ રાખ્યા બાદ જો જથ્થો બચશે તો જ તે સિંચાઈ માટે ખેડૂતોને આપવામાં આવશે.</p> <p>આ ઉપરાંત, 'સૌની યોજના' મારફતે જે વિસ્તારોમાં પાણીની વધુ જરૂરિયાત છે, ત્યાં પૂરતું પાણી પહોંચાડવાનું સુદઢ આયોજન કરવામાં આવ્યું હોવાનો દાવો પણ તેમણે કર્યો હતો.</p> <p><strong>પાલ આંબલિયાના સરકાર પર આકરા પ્રહાર</strong></p> <p>મંત્રીના આ તમામ દાવાઓ પર કિસાન નેતા પાલ આંબલિયાએ આકરા પ્રહારો કર્યા છે. તેમણે મંત્રી કુંવરજી બાવળિયાને દ્વારકા જિલ્લાના ગામડાઓની રૂબરૂ મુલાકાત લેવા ખુલ્લું આમંત્રણ આપ્યું છે.</p> <p>આંબલિયાએ કટાક્ષ કરતા કહ્યું કે, નેતાઓએ માત્ર સોશિયલ મીડિયા પર રીલ બનાવવામાંથી બહાર આવીને રિયલમાં (વાસ્તવિકતામાં) લોકોને ઘાસચારો અને પીવાનું પાણી પૂરું પાડવું જોઈએ.</p> <p>તેમણે સરકારને સર્વેના નાટકો બંધ કરવાની અપીલ કરી છે. સાથે જ નિયમોનુસાર ખેડૂતોને તાત્કાલિક ધોરણે દુષ્કાળગ્રસ્ત વિસ્તારના લાભો આપવાની ઉગ્ર માંગણી પણ કરી છે.</p> <p><strong>માલધારીઓની હિજરત અને જમીની વાસ્તવિકતા</strong></p> <p>સ્થાનિક પરિસ્થિતિનો ચિતાર આપતા પાલ આંબલિયાએ જણાવ્યું કે, અનેક ગામડાઓમાં 8 થી 28 દિવસ સુધી પીવાનું પાણી ન આવતું હોવાની વ્યાપક અને ગંભીર ફરિયાદો ઊઠી રહી છે.</p> <p>સરકારે શરૂ કરેલા ઘાસચારા વિતરણ કેન્દ્રો માત્ર શોભાના ગાંઠિયા સમાન બની રહ્યા હોવાનો આક્ષેપ પણ તેમણે કર્યો હતો. પૂરતો ઘાસચારો ન મળવાને કારણે માલધારીઓની હાલત કફોડી બની છે.</p> <p>પોતાના પશુધનને બચાવવા માટે માલધારીઓ પોતાના વતનથી અન્ય વિસ્તારોમાં હિજરત કરવા મજબૂર બન્યા છે. આ સ્થિતિ સરકારના દાવાઓની પોલ ખોલી રહી હોવાનું તેમણે અંતમાં જણાવ્યું હતું.</p> <p><iframe title="ABP Asmita | Gujarat Weather Update | Headlines Today | Gujarat Politics | Gujarat Breaking News" src="https://www.youtube.com/embed/dLKYujgl3Dw" width="1335" height="751" frameborder="0" allowfullscreen="allowfullscreen"></iframe></p>